Nagkaroon ng pagpupulong si Senator Imee Marcos kasama si Mayor Ross Rizal at lahat ng barangay chairman ng Calamba at Santa Rosa, Laguna upang makuha ang saloobin sa kanilang pagse-serbisyo sa barangay sa loob ng labing walong buwan (18) months.
Sa pagharap ni Marcos sa mga media, sinabi niya na ang anim na taong termino “ay sapat” at “magbibigay-daan sa mga opisyal na ito na hindi lamang sumunod sa lahat ng mga utos at mandato ng Pambansang Pamahalaan at iba’t ibang lokal na pamahalaan, kundi pati na rin magdisenyo at magpatupad ng kanilang sariling mga patakaran at proyekto para sa ikabubuti ng kanilang mga barangay.”
Ang pagpapalawig ng kanilang termino ay makakatipid din ng pera sa gobyerno dahil ang Commission on Elections (Comelec) ay hindi na kailangang magsagawa ng mas maraming halalan na ang bawat isa ay nagkakahalaga ng P18 bilyon, ayon kay Marcos.
Binanggit ng senador ang kahalagahan ng trabaho ng mga opisyal ng barangay bilang “tagapamagitan, tagapamayapa, social worker, rescue worker, at kinatawan ng mga tao” at bilang mga katuwang ng gobyerno.
“Sayang na dahil sa kanilang maraming tungkulin at responsibilidad, ang mga opisyal ng barangay ay madalas na walang pagkakataon na bumuo, mag-develop, at magpatupad ng kanilang sariling mga patakaran at proyekto,” sabi ni Marcos. (Joel Cabactulan/Nelson Dimapilis)